LAOAG CITY – Saan nga inawat ni King Abdullah ti Jordan ti plano ni US President Donald Trump a papanawen ken iyakar iti sabali a pagilian dagiti Palestinians manipod iti Gaza.
Napasamak daytoy kalpasan ti taripnong da King Abdullah ken Trump iti White House.
Inpetteng ni King Abdullag a ti Jordan ket nagtalinaed nga “steadfast” kontra iti pannakapadisi kadagiti Palestinians iti Gaza ken iti West Bank, gapu ta daytoy ti maymaysa a posisyon ti Arab.
Daytoy ti kaunaan a gundaway a nagtaripnong dagiti dua sipud inwaragawag ni Trump ti plano na a mangsakop iti Gaza ken iyakar ti populasyon na a dua a milyon a Palestinias iti nagduduma a pagilian, karaman ditoyen ti Jordan.
Immunan a nagboluntaryo ni King Abdullag a mangawat agingga iti 2 ribo nga ubbing a Palestinian manipod iti Gaza nga agkasapulan ti medical care, ngem inpaganetget na a ti balbaliw a pannakaestablisar ti Gaza ken panangsolbar ti humanitarian crisis ti umuna a tutukan.
