LAOAG CITY – Nasaludsud iti panagdengngeg ti House Quad Committee seknan dagiti transaksyon ni Alice Guo ken ti potensyal a koneksyon na iti criminal syndicates a Fujian gang.
Segun ken ni Batangas 2nd District Rep. Gerville “Jinky Bitrics” Luistro, adda ti atap da a konektado ni Guo kadagiti indibidwal manipod Fujian, maysa a rehiyon iti China a maibagba nga adda dagiti gang na.
Ti Fujian gang ket maibilang kas maysa a sindikato a kas kadagiti triad, a pakairamanan dagiti gang nga immakar iti Hong Kong ken local networks iti Fujian.
Maysa kadagiti naipakita nga ebidensya ti poster ti panagkablaaw manipod kadagiti negosyante nga intsik a nakabase iti Maynila, nga orihinal a manipod iti Fujian, a nagselebrar iti pannakaelektar ni Guo kas kaunaan nga Intsik a mayor iti Pilipinas idi 2022.
Basar pay iti inparuk-at nga impormasyon manipod iti rekord ti Bureau of Immigration, ni Guo ket dependent ti ina na a ni Lin Wen Yi, a taga Fujian.
Dinakamat pay ni Luistro a ti dua a kasosyo ni Guo ken dagiti pada na nga incorporators ti Bamban-based a Baofu Land Development Inc. a da Lin Baoying ken Rujin Zhang nga agpada a nasentensyaan iti panaglabsing iti anti-money laundering iti Singapore, ket manipod metlaeng iti Fujian.
Agdudua ti kongresista no nairana laeng wenno indikasyon na a karaman ni Guo kadagiti ilegal nga aktibidad a konektado iti Fujian gang.
