LAOAG CITY – Inikkan ti Korte Suprema ti 10 nga aldaw ti Kongreso ken ni Executive Secretary Lucas Bersamin nga agkomento iti petision seknan iti 2025 National Budget.
Ti nasao a petition for certiorari and prohibition ket inpila ni dati nga Executive Secretary ken Senatorial aspirant Vic Rodriguez, Davao City 3rd district Rep. Isidro Ungab ken dadduma pay.
Nainaganan met kas respondent ni Executive Secretary Bersamin pakairamanan da Senate President Francis Escudero ken House Speaker Martin Romualdez.
Iti nasao a petision, inkalintegan dagiti petitioner nga unconstitutional ti 2025 General Appropriations Act (GAA) gapu kadagiti naduktalanda a blangko nga items iti bicameral report.
Napaay a makailatang ti ingkapilitan a panangpundo para iti PhilHealth, maikanniwas iti paglintegan a panagngato ti appropriations a lumabes kadagiti rekomendasion ti Presidente ken panangipangpangruna iti imprastruktura imbes nga iti benneg ti edukasion.
Maipalagip a namunganayan ti panangkwestionar iti pundo kalpasan nga inbutaktak ni Cong. Ungab ti naduktalan a missing amount kangrunaanna iti items iti babaen ti Department of Agriculture ken unprogrammed appropriations kadagiti sumagmamano a panid ti bicam report.
Binabalaw pay ni dati a Presidente Rodrigo Duterte a karaman iti nasao a podcast dagiti nakita a blank spaces a rason nga inawaganna ti budget nga “invalid.”
Kinumpirmaran met ni Acting House Appropriations Committee Chairperson Stella Quimbo nga adda ti blank items iti bicam report ngem inlawlawagna a nadakamat dagitoy sakbay a napirmaan ti report.
Kabayatanna, inpetteng ni Presidente Ferdinand Marcos Jr. nga awan ti blangko a panid iti pinirmaanna a 2025 General Appropriations Act.
