LAOAG CITY – Nangipaay ti privilege speech ni Konsehal Jason Perera kabayatan ti sesyon iti konseho mainaig kadagiti fire hydrants a manarimaan a main-instolar a proyekto ti gobierno lokal ditoy ciudad ti Laoag.
Inbatad na a dakkel a saludsud kenkuana no maiyannatop metlaeng ti naiyalokar a pondo para iti produkto a naawat ti gobierno lokal ditoy ciudad.
Inlawlawag ni Perera a nangiyalokar ti konseho ti 100 a ribo a pisos iti kada fire hydrant ken basar iti City Engineering Office ket agbalor amin ti P4.5-milyon a pisos dagiti fire hydrants.
Nupay kasta, inpetteng ti konsehal a ti nailanad a balor dagiti fire hydrants ket saan a maiyannatop iti itsura dagiti nasao a produkto gapu ta bassit unay.
Kunana pay a malaksid iti pondo ti fire hydrants ket sabali pay ti 10 ribo a pisos a naiyalokar a budget ti prime water, ngem no kitkitaen ket ipaay a libre ti nasao a kompanya ti danom a maisupply kadagitoy isut gapuna a nalaklaka koma pay ti presyo dagiti nasao a produkto.
Inpakaammo na a nagdamdamag ti presyo ti fire hydrant ken naduktalan na a ti kanginaan ket ti fire hydrants jet nga agbalor ti 20 ribo a pisos idinto a 9 a ribo a pisos ti regular ken ti kalakaan ket agbalor ti 3 ribo a pisos.
Inrakurak na pay a ti kalikagom na a maala a fire hydrant ket dagiti ado ti pakaisulbongan ti tubo iti nagduduma a size gapo ta dagiti asideg nga establishimento ket adda ti maipaay nga hose a mabalin da nga usaren a mangsebseb ti apoy kabayatan a maiyur-uray dagiti kameng ti Bureau of Fire Protection.
Inkalintegan na a saan a mangak-akusar nga adda ti korapsyon iti nasao a proyekto ngem ti laeng kalikagom na ket masigurado no umno metlaeng ti presyo dagiti fire hydrants ken ti pannakabusbos ti pondo.
Maipalagip nga iti napalabas a sesyon ket kiniddaw ni Perera ti cost ken specification dagiti fire hydrants a kas nakailanad ti kontarata, ngem segun iti Sang Panlungsod secretary ket awan pay ti naawat da a sungbat manipod iti opisina ni Mayor James Bryan Alcid.
