LAOAG CITY – Kwinestionaran ni Sangguniang Panlungsod Member Jason Perrera no ania a klase ti leadership wenno panangidaulo iti adda iti agdama iti City Government of Laoag no apay nga adda dagiti department heads a saan a makaat-atendar iti imbitasion dagitoy iti Sangguniang Panlungsod.
Segun kenkuana, kalikagum ti konseho nga agbalin a transparent kadagiti tattao tapno saanda a masdaaw kadagiti mapaspasamak.
Inbatadna nga adda koma ti rumbeng a maiwayat nga imbestigasion babaen ti nabukel a Quad Committee maipanggep iti maipagarup a korapsion ngem saanda a maisayangkat daytoy gapu ta saan met nga agparparang dagiti maim-imbitaran a resource speakers.
Inlawlawagna a daytoy ket mainaig pay laeng iti immun-unan nga alegasion nga adda ti maipagarup a panagsingir wenno panagkolektar ti renta kadagiti aglaklako ti sumagmamano a kalsada ken plaza ditoy siudad ti Laoag.
Kunana nga isuna mismo ti nangikkat ti panagkolektar ti renta ditoy siudad kas panangsurot iti pagalagadan ti national government ngem adda latta ti maipagarup a panagkolektar a mapaspasamak.
Gapu iti daytoy, inpakaammo ni Atty. Perera nga adu dagiti saludsod iti nasao a komite nga agpapan ita ket saan pay a nasungbatan.
Innayonna a masdaaw daytoy gapu ta no maipanggep iti panagkiddaw ti pundo ket alistoda nga agatendar ngem no imbestigasion ket narigatda a mapaayaban.
Nangbukel ti Sangguniang Panlungsod ditoy siudad ti Laoag ti Quad Committee tapno duktalen ti sungbat dagiti nagduduma a saludsod a maidandanon kadakuada maipanggep iti panagkolektar ti renta kabayatan ti panagfiesta ditoy siudad.
Kabayatanna, naammoan a ti Quad Committee ket bukbuklen ti Committee on Games and Amusement, Committee on Tourism, Committee on Laws ken Committee on Ways and Means.
