LAOAG CITY – Natukkol ti akin kannigid a saka ti maysa a lalaki kalpasan a nagdinnungpar ti dumptruck ken motorisiklo iti paset ti Brgy. 13 ditoy siudad ti Laoag.
Inbatad ni Police Corporal Artemio Magaoay Jr., duty investigator ti PNP Laoag Traffic Division a bayat nga agpapaabagatan ti dump truck ket immabay ti motorsiklo nga agturong iti kapada a direksyon.
Innayun na nga iti pay pannakaiyuswat ti imbestigasion, saan a nadlaw ti driver ti dump truck nga adda iti abay na ti motorsiklo agingga a nadungpar daytoy.
Gapu iti daytoy, natumba ti nangiturong ti motorsiklo ken naipasirok ti akin kannigid a saka na ken isu met ti puon iti pannakatukkol daytoy.
Dagus a naitaray iti Gov. Roque B. Ablan Sr. Memorial Hospital ti nangiturong ti motorsiklo para iti panakataming na.
Naamoan nga awan iti impluwensya ti nasanger dagiti agpada a driver.
Kabayatanna, inpasigurado ti saan a nadangran a driver ti truck a mangipaay ti tulong iti driver ti motorsiklo.
