LAOAG CITY – Natay ti maysa a lalaki kalpasan a napaltu-paltogan iti Brgy. 5, San Pedro ditoy siudad ti Laoag.
Nabigbig ti biktima a ni Andres Tungpalan Daquioag, agtawen ti 59, addaan ti live-in partner ken residente ti Brgy. 19 ditoy siudad ti Laoag idinto a saan pay a nabigbig ti suspek.
Basar iti Laoag City Police Station, agarup 12:38 itay parbangon ita nga aldaw, kabayatan a nakatugaw ti biktima iti motorsiklona a Mio 125 nga agmaris ti blue ken white nga addaan ti plate number a 366 IHN a naka-parking iti sangoanan ti maysa a convenience store idi a kellaat nga adda ti immasideg kenkuana a lalaki nga adda ti paltogna manipud iti laud ket pinaltoganna ti biktima iti namindua a daras iti likud ti ulona.
Mainaig iti daytoy, dagus a naglibas ti suspek idinto a naitaray ti biktima iti Governor Roque B. Ablan Sr. Memorial Hospital ngem naideklara a dead on arrival iti oras ti 12:45 ti parbangon babaen ti attending Physician a ni Dr. Franky Albano.
Iti agdama, manarimaan ti panangimbestigar dagiti otoridad kadagiti ala ti Close Circuit Television camera ken nangiwayatda ti hot pursuit operation wenno drag operation tapno matiliw ken maammoan ti pakabigbigan ti suspek.
Kabayatanna, nakikoordinar ti Laoag City Police Station iti Ilocos Norte Provincial Forensic Unit para iti pannakaiwayat ti Crime Scene Processing no sadinno a narekobreda ti dua a kapsula ti bala ti paltog a maipagarup a Caliber .45.
