LAOAG CITY – Balligi ti naiyuswat a drug buy bust operation iti Barangay San Lorenzo iti ili ti Bangui babaen iti nagtitipon a pwersa ti PNP, PDEA, PDEU ken ti Provincial Intelligence Unit ti INPPO.
Nabigbig ti subject ti operasyon a ni Mr. Jim Peralta y Latupan, agtawen ti 43 ken residente iti nasao a barangay.
Basar iti report, ni Peralta ket maibilang nga High Value Individual ditoy probinsya ken Top 10 iti Regional Level.
Nakumpiskar iti operasyon dagiti uppat a sachet ti maipagarop a shabu, maysa a sachet a residue kasta pay ti nausar iti transaksyon a maysa a sachet ti maipagarop a droga ken sangaribo a pisos a nagserbi a marked money.
Segun kenni Police Captain Julius Basalio, ti chief of police ti PNP-Bangui, tallo agingga iti uppat a bulanen a monmonitoren dagiti otoridad ni Peralta.
Inbatad na a naibilang a regional level ni Peralta gapo ta umabot pay iti boundaries iti kabangibang a probinsya ti operasyon na.
Kunana nga ita a panawen ti pandemya ket maibilang nga APOR ni Peralta gapo ta aglaklako daytoy ti gasol ngem inusar na ti trabaho na a makitransaksyon.
Naamoan a ni Peralta ket user ken pusher ken maibilang a notorious drug personality.
Mainaig iti daytoy, kunana a gagangay laeng iti drug operation a saan nga admitiren dagiti suspek ti aramid da ngem agsungbat to latta iti korte.
Iti agdama ket addan iti kustudiyar ti PNP-Bangui ni Peralta ken maisagsaganan ti kaso a maipila kontra kenkuana.
