LAOAG CITY – Inrakurak ni Mayor James Bryan Alcid a malukatan ti akin- laud a paset ti Gilbert Bridge tapno mausar nga alternatibo a dalan nga agturong iti SM City of Laoag.
Inbatadna a sakbay a nagtugaw daytoy iti puesto ket nakisarita isuna iti Department of Public Works and Highways no kasano ti maaramid iti dike gapu ta daytoy ket saan a nadisenio nga agbalin a kalsada.
Inlawlawagna a napatibker ti lugar gapu ta adda dagiti naikabit a landok, nakonkreto iti sangona ken maipalawa pay iti likudna.
Kunana a basar iti Department of Public Works and Highways ket nagsuratdan para iti pannakalukat ti nasao a mapagbalin a kalsada.
Kabayatanna, manarimaan a maad-adal no posible nga addanto pay ti maaramid a pagruaran wenno exit point dagiti nagduduma a behikulo a kumamang met iti daya iti dike iti ili ti San Nicolas.
