LAOAG CITY – Nagpalagip ti Land Transportation Franchising and Regulatory Board (LTFRB) nga adda latta ti diskwento iti plete ita a  Semana Santa.

Gapu iti daytoy, binalakadan ti ahensya dagiti estudyante, persons with disability ken senior citizens nga aglugan kadagiti pampubliko a transportasyon nga agkidda ti diskwento ken ipakita a dagus kadagiti driver wenno konduktor dagiti valid nga Identification Card da kas pammaneknek.

 Naipalaon iti linteg a Republic Act Nos. 11314 ken 10754, nga addaan ti 20 a porsiento a diskwento iti plete dagiti  estudyante, Persons with disability ken senior citizen uray holiday, weekend wenno semestral break.

 Inpalagip pay ti ahensya a dagiti operator, ken saan a dagiti driver ti rumbeng a mangibaklay iti ipaay a  diskuwento, kas maiyataday iti LTFRB Memorandum Circular 2025-010.