LAOAG CITY – Naipatungpalen ti manhunt operation kontra ken ni dati a Presidential Spokesperson Harry Roque dagiti operatiba ti Philippine National Police (PNP) nga indeklara a warrant ti Quad Committee ti Kamara.
Segun ken ni Santa Rosa City Rep. Dan Fernandez, co-chair ti Quad Committee, naminsan manen a pinatawan ti contempt ni Roque idi Huebes kalpasan a saan a nagatendar iti panagdengngeg maipapan iti iligal nga operasion ti Philippine Offshore Gaming Operator iti pagilian.
Malaksid kadagiti subpoena, naiserbi pay ti arrest order iti pangopisinaanna iti Makati City ngem saanda a nakita. Naudi a nakita ni Roque iti Antel Corporation Centre idiay Makati City.
Atapen dagiti otoridad nga aglemlemmeng ni Roque ita nga in-inuten a maibutbutaktak ti koneksion daytoy iti Lucky South 99, ti Philippine Offshore Gaming Operator hub a ni-raid dagiti otoridad iti Porac, Pampanga a nakakumpiskaran kadagiti binulto a droga.
Karaman kadagiti ipasubmitir ti Quad Comm ken ni Roque ket dagiti dokumento kas ti Statements of Assets, Liabilities and Net Worth, rekord ti Biancham Holdings a kukua ti pamiliana pakairamanan ti dokumento iti pinaglakoanna a daga iti Parañaque City.
Immunan a kwinestionaran ni Batangas Rep. Gerville “Jinky Bitrics” Luistro ni Roque no kasano nga immadu ti investment daytoy ti P67 a milyon iti uneg laeng ti sumagmamano a bulan no sadinno 3 a milyon a pisos laeng ti inserrekna iti panagpuunan idinto ti pinaglakoanna a daga iti Parañaque ket dumanon iti pito a milyon a pisos laeng.
