LAOAG CITY – Nakaala ti balbala dagiti kameng ti PNP-Sarrat iti naiyuswat a search warrant operation iti Barangay 8 iti nasao nga ili.
Ti subject ti operasyon ket ni Jordan Bumanglag, agtawen ti 41, mangisursuro iti Sta. Rosa National High School ken residente iti nadakamat a barangay.
Segun kenni Police Captain Carlo Abing, ti chief of police ti PNP-Sarrat, nakalanad iti search warrant a ti biruken dagiti otoridad ket maysa a kalibre 45 ken 9MM a paltog ken balbala.
Inbatad na nga iti panagsukimat ti grupo dagiti pulis iti pagtaengan ni Bumanglag ket balbala laeng ti naala dagitoy nga adda iti bassit a pouch ken naikabil iti sirok ti katre ti anak na.
Karaman kadagiti bala a naala da ket innem a bala ken lima nga empty shells ti kalibre 45 ken tallo a bala ken innem nga empty shells ti 9MM a paltog.
Kunana a saan da nga ammo no siasinno ti agtagikua iti pouch a nakaalaan dagiti pulis ti bala ken daytoy ti ummuna a gundaway a naisayangkatan ti search operation.
Ummuna iti daytoy, inbatad ti hepe nga adda ti dimmanon kadakuada a report nga adda ti ikot ni Bumanglag a paltog ken positibo ti panang-validate da iti lima nga aldaw isut gapo na a naiyuswat ti operasyon.
Naamoan a ni Bumanglag ken awan ti madi a rekord na iti Barangay ken uray iti Philippine National Police iti nadakamat nga ili.
Innayon na a sumango ti Bumanglag iti panaglabsing iti RA 10591.
Kabayatanna, mamati ni Mr. Jordan Bumanglag iti Barangay 8 iti ili ti Sarrat ken subject ti operasyon a rumwar ti kinapudno nga awan ti iduldulin na a bala iti laksid a nakaala dagiti otoridad iti kwarto ti anak na.
Segun kenni Bumanglag, kanayon nga agdalos ti anak na iti kwarto na isut gapo na a saan da a patyen nga adda ti pouch a naglaon ti balbala iti sirok ti katre ti anak na.
Kwinestyunaran na pay no apay a nagsisinnublat dagiti pulis a napan nagsukimat iti kwarto ti anak na no sadinno a ti ummuna ket awan ti nakita na ngem ti maikadwa a simrek ket addan ti naala na a balbala.
Kunana nga idi adda ti nakita dagiti pulis a balbala ket dinamag na iti anak na no apay nga adda ti sirok ti katre na ngem nagsangit ti anak na gapo ta saan na nga ammo no apay nga adda ti pouch a nagalon ti balbala.
Gapo iti daytoy, kunana a saan nga adayo a naimula daytoy gapo ta nagsisinublat pay dagiti pulis a simrek.
Inpetteng na pay a maysa kadagiti pulis a nagsukimat ket saan a nakasuot ti gloves ken naivideo da daytoy.
Innayon na a saan na nga itarayan daytoy a banag gapo ta ammo na nga awan ti basol na ken rumwar ti kinapudno.
Iti agdama, kunana a kinasarita na ti kabsat na ken nagpatulong iti am-ammo na nga abogado.
