LAOAG CITY – Inlawlawag ni Barangay Chairman Oliver Valite iti Barangay Naglicuan iti ili ti Pasuquin nga adda ti resolusyon ti barangay a saan da nga ikkan ti renewal ti business permit ti poultry farm a kukua ni Mr. Willy Florida gapu kadagiti sumagmamano a reklamo dagiti kabarangayan na.
Segun ken ni Barangay Chairman Valite, iti napalabas a tawen ket ado dagiti kabarangay na a nangireklamo iti poultry farm gapu iti kaado ti ngilawna.
Malaksid iti daytoy, adda pay ti petisyon dagiti residente ken ti Parents, Teachers and Community Association wenno PTCA iti Naglicuan Elementary School a masapol a mapaserraan ti nasao a poultry farm.
Kuna ti kapitan a nabayagen a mairekreklamo ti nasao a poultry farm, ken binisita pay daytoyen ti lokal a gobierno iti ili ti Pasuquin babaen iti Sanidad, kasta pay dagiti kameng ti Department of Environment and Natural Resources (DENR), Provincial Health Office, Treasury, Engineering Department ken iti Zoning Department.
Gapu iti daytoy, nangiparuk-at ti Sanidad ti Sanitary Order para iti pannakasuspenso nga agoperar ti nasao a poultry farm iti 60 nga aldaw, nangrugi idi Nobyembre 14, 2024 agingga iti Enero 14 ita a tawen.
Nupay kasta, kuna ni Valite nga idi Disyembre iti napalabas a tawen ket kinargaan manen da Florida ti poultry farm da isut gapuna nga inreport da daytoy iti Sanidad, ngem agpapan maisursurat daytoy a damag ket awan pay ti naawat ti barangay a resulta iti nagbalin nga addang ti nasao nga opisina.
Immuna iti daytoy, inpetteng ni Mr. Florida a na-comply dan ti inbilin ti sanidad nga aramiden da isut gapuna a kinargaan da manen ti poultry farm da.
Inpetteng met ni Kapitan Valite a no pudno ti ibagbaga ni Florida ket masapol nga agsurat koma met ti sanidad kadakuada a mangipakaammo a naaramiden ti akinbagi iti poultry farm dagiti naibilin nga ikorehir na tapno adda ti ipakita da kadagiti kabarangayan da.
