LAOAG CITY – Nagsagaba ti maysa a senior citizen ti sugat iti nagduduma a paset ti bagi na kalpasan a dinangran isuna ti apoko na iti Barangay 5 ditoy ciudad ti Laoag.
Iti nagbalin a palawag ni Mrs. Lorna Clemente, nagiinom da Christopher Corpuz idi rabii ti Sabado, Nobiembre 9 iti sangu ti balay da.
Ngem idi nabartek ni Corpuz ket nagprobokar daytoy isu a sinaludsod ni Clemente no ania ti problema ti apoko na ngem ditoy a pinanagtaanna a danogen ti rupa na.
Idi nakalikod ni Clemente, kellaat a dinarup isuna ti apoko na ken dinanog na agingga a napaidda.
Kuna ni Mrs. Clemente nga idi nakabangon daytoy ket insigida a nagtaray a nagpauneg iti pagtaenganda ngem ginandat manen ni Corpuz a darupen daytoy.
Naganawa ti asawa ti maysa pay nga apoko na, ngem kinagat daytoy ni Corpuz.
Nakapagpamedikal metten ti biktima ken nagturong iti biang ti Barangay tapno ireport ti insidente ken manamnama nga agsasarita da inton Nobiembre 13 ken plano da pay nga iyuman ti napasamak iti biang ti Department of Social Welfare and Development (DSWD).
Mainaig iti daytoy, inpakaammu na nga awan met ti susik da a dua ngem no mabartek ti apoko na ket masansan nga kariten na daytoy.
Malaksid iti daytoy ket maipagarup a masansan pay a kabkabilen pay ni Corpuz ti live-in partner na.
Kabayatanna, nagturong met ti Bombo Radyo Laoag news team iti pagtaengan da Corpuz ngem matmaturog daytoy ken awan nadanonan kadagiti nagannakna.
