lAOAG CITY – Inbatad ni Ms. Ryan Simon, mangidadaulo iti Municipal Disaster Risk Reduction Management Office iti ili ti San Nicolas nga adda ti naawatna a report maipanggep iti slope protection wall iti diversion dam iti Brgy. 16 iti nadakamat nga ili.
Segun kenkuana, nga ado dagiti dumaldalyasat a motorista iti asideg a narba a slope protection wall ket nangipan da ti caution tape tapnu maliklikan ti aniaman nga insidente.
Kinunana a basar iti report manipud iti Municipal Engineering Office iti nadakamat nga ili agatiddog ti slope protection wall iti 50 meters.
Innayonna, a maireport ti nadakamat nga insidente iti biang ti Department of Public Works and Highways gapu ta maibilang daytoy kas maysa a national project.
Malaksid iti daytoy, adda dagiti nagduduma a barangay iti ili ti San Nicolas ti insigida a nagrespondean kas kadagiti nalayus a pagtaengan.
Mainaig iti daytoy, ket insigida a napan dagiti clearing team idiay Brgy. 2 nga asideg iti Black Nazarene Hospital tapnu madalusan ti natumba a kayo ti Mangga ken mannarimaan ti pannaka-clear ti area iti national highway nga asideg iti Villialiga.
Kabayatanna, nakasagana dagiti rescue team operations nga agresponde kadagiti nagduduma a barangay iti nadakamat nga ili a maapektaran iti Bagyo Carina.
