LAOAG CITY – Maragsakan ni Mayor Michael Marcos Keon ti panagbalin a kampeon ti Schools Division Office ti Laoag City a naisayangkat a 2024 Region 1 Athletic Association Meet.
Segun kenkuana, iti kada gold medal a nagun-od ti maysa nga atleta ket maipaayan ti tallo a ribu a pisos, ti silver medal ket dua a ribu a pisos idinto ti bronze medal ket maysa a ribu a pisos kas gungguna dagitoy.
Inbatadna a dagiti nangabak ti gold medal iti team category kas ti basketball ket saanna a kayatna a saoen a tallo a ribu a pisos ti maited kadakuada no di ket dakdakkel ti premio a maiyawat kadakuada.
Inlawlawagna a dakkel ti tulong ti Local Finance Committee iti nagbalin a laban dagiti amin nga atleta iti nasao nga Schools Division babaen iti pannakagatang kadagiti sports equipment a masapol dagiti maseknan nga umaayam.
Kunana a nagbunga ti napintas a resulta ti tallo a bulan a panagsanay dagiti amin nga atleta banag a masapol a marambakan daytoy a naindaklan a balligi iti siudad ti Laoag.
Mainaig iti daytoy, inpakaammona nga adda ti maangay a Victory Party inton Mayo 10 kas panangrambak ti panagballigi ti Schools Division ti Laoag City no sadino atendaran daytoy da Dr. Joann Corpuz, ti Schools Division Superintendent ditoy siudad ti Laoag, dagiti opisial ken dadduma pay.
Kunana nga adda dagiti sumagmamano nga atleta ti kualipikado a sumrek iti Palarong Pambansa a maiyuswat inton Hulio 6 idiay Cebu.
Innayonna a nasaysayaat a tutukan ti Philippine Sports Commission dagiti local athletes imbes a dagiti foreign athletes tapno mangted ti pammigbig iti bukud a pagilian.
Kabayatanna, dinayawna dagiti runners a nakipaset iti Region 1 Athletic Association Meet gapu ta ammona ti kinarigat ti training dagitoy iti baet ti kinabara ti panawen.
