LAOAG CITY – Natay ti maysa a lakay kalpasan a nadungpar ti nagluganna a motorsiklo ti maysa a bus iti Brgy. Pias, Currimao, Ilocos Norte.
Nabigbig ti biktima a ni Orlino Salaan, agtawen ti 63, balo ken residente ti Brgy. Victoria iti ili ti Currimao, Ilocos Norte; idinto a ti driver ti bus ket ni Romel Laforga, agtawen ti 45, naasawaan ken residente ti Brgy. Pasuc iti ili ti Badoc.
Segun ken ni Police Captain Michael Permison, Officer In Charge ti Philippine National Police ti Currimao, bayat a dumaldalyasat ti motorsiklo ket dita a kellaat a nadungpar ti sumarsaruno a bus a nangitunda ti desgrasya.
Inbatadna a nagsagaba ni Salaan ti sugat iti nagduduma a paset ti bagina kangrunaan iti ulona, idinto a saan met a naan-ano ti driver ti bus ken dagiti pasaherosna.
Dagus met a naitaray ti biktima iti Mariano Marcos Memorial Hospital and Medical Center iti ciudad ti Batac ngem natay met laeng bayat ti pannakataming na.
Naammoan a nakainom ti arak ni Salaan ken awan ti suotna nga helmet.
Iti agdama, agtultuloy ti imbestigasion dagiti otoridad seknan iti nasao nga aksidente.
