LAOAG CITY – Mamati ni Ms. Tony Carag, mangimatmaton iti maysa nga hotel and resort iti ili ti Currimao a napateg dagiti opinyon ken komento dagiti guest-da para iti napinpintas pay a pannakaiserbi ti serbisio kadagitoy.
Segun kenkuana, dakkel a tulong dagiti suhestion wenno rekomendasion dagiti guest-da gapu ta babaen iti daytoy ket maammoanda dagiti banag a masapol a masuktan wenno mainayon iti serbisioda.
Inbatadna a gapu iti panagtulid ti panawen ket ad-adda pay a pinagbalinda a moderno ti disenio ti imatmatonanna nga hotel and resort tapno ad-adda met a maallukoy dagiti bisita wenno turista nga ag-check in kadakuada.
Inlawlawagna a kanayon ti panangipasiguradoda ti nasayaat a maipaay a serbisio kas ti nadalos a kuarto, naimas a taraon ken napintas a serbisio.
Kunana a ti panagadu ti guest-da ket no adda ti long holiday, summer vacation ken holy week idinto a nakapsot met no adda ti sumangbay a bagyo.
Innayonna nga adda pay ti function hall a mabalin a pakaiyuswat ti seminar wenno aniaman nga aktibad ken programa.
Kabayatanna, naammoan a ti nasao nga hotel and resort iti ili ti Currimao ket addan ti 17 a tawen nga agop-operar.
