LAOAG CITY – Umabot iti nasurok-kumurang nga 478 a milyon a pisos ti nailatang a pundo para iti pannakaipatungpal kadagiti proyekto imprastraktura iti maikadua a distrito.
Segun ken ni Engr. James Ferrer, ti District Engineer iti Department of Public Works and Highways Second District Engineering Office, adda ti 53 a proyekto ti maipatungpal babaen iti nasao a pundo a naiyalokar.
Inbatadna a maibusbos ti dakkel a gatad a pundo iti construction multi-purpose building babaen iti basic infrastructure programs.
Inlawlawagna nga iti agdama ket adda ti 31 a proyekto ti manarimaan a maipatpatungpal idinto a dagiti dadduma ket isu ti sumarsaruno apaman a maileppas dagiti masapol nga umiso a proseso.
Kunana nga adda ti maysa a flood control a manarimaan met a maipatpatungpal iti Brgy. Nagrebcan iti ili ti San Nicolas a napundoan ti 50 a milyon pisos.
Innayonna nga adda dagiti sumagmamano pay laeng a proyekto idi 2023 a saan pay a naileppas ngem ikarkarigatanda nga ileppas ita a tawen.
Kabayatanna, naammoan nga umabot iti 122 a proyekto idi 2023 ngem adda pay ti 11 a proyekto ti manarimaan a maipatpatungpal.
