LAOAG CITY – Nagpanawagan ni Senador Sherwin Gatchalian iti gobierno nga agsagana ti supplemental budget tapno maprotektaran dagiti Pilipino iti epekto ti agtultuloy a tension iti Middle East.
Inbatad ni Gatchalian, mabalin nga agkasapulan ti nayon a P60 bilyon agingga iti P400 bilyon tapno maituloy ti social amelioration programs no agpaut ti krisis.
Insingasingna ti posibilidad ti Bayanihan 3 pakairamanan ti loan reprieve ken temporario a panagsardeng ti interest iti credit cards.
Iti report ti Senate PROTECT nga insubmitir iti Malacañang Palace, inrekomendar ti targeted aid kas ti P1,500 a binulan a tulong para iti 5 milyon a minimum wage earners ken MSME workers ken nayon nga ayuda para iti 3.5 milyon a benepisiario ti Pantawid Pamilyang Pilipino Program (4P’s).
Karaman iti gakat ti P3,000 a binulan nga ayuda para iti 1.4 milyon a marigrigat a pamilia ken panangpalawa ti Walang Gutom Program tapno mapapigsa ti seguridad iti taraon.
