LAOAG CITY – Nangiparuk-at ti pammilin ti National Disaster Risk Reduction and Management Council kadagiti amin a member agency-da ken dagiti Local Disaster Risk Reduction and Management Council a paigetan ti panagsagana kalpasan a naideklararen ti panangrugi ti warm ken dry season iti pagilian.
Iti naiparuk-at a memorandum a pinirmaan ni National Disaster Risk Reduction and Management Council Executive Director Usec Harold Cabreros, nabilin dagiti Disaster Risk Reduction and Management Council a siguradwen a nakasagana ti emergency medical services, adda ti umdas a suplay ti agas, cooling equipment, ken napaspas a deployment dagiti response teams.
Mapabileg pay ti pannakaisaknap dagiti health advisory ken pammalagip iti publiko kas ti panangliklik iti nakaro a pudot manipud alas dies iti bigat agingga iti alas kuatro iti malem, panagisuot iti presko a kawes ken panagaramat iti payong wenno kallugong.
Nabalakadan met ti sektor ti agrikultura a mangipatungpal iti climate-resilient practices tapno maalay-ayan ti epekto ti nakaro a kinabara ken pasaray agbaliw a panawen iti produksion da.
