LAOAG CITY – Rinescue dagiti otoridad ni Patrolwoman Cherie Simon, naka-assign iti PNP-Vigan ken residente iti Barangay Balacad ditoy ciudad ti Laoag gapo iti maipagarop a panangkabkabil kenkuana ni Police Col. Jay de Guzman, Deputy Provincial Director for Administration iti Ilocos Sur Police Provincial Office (ISPPO).
Basar ti nakalap nga impormasyon ti Bombo Radyo Laoag, maipagarop a kinabkabil ni de Guzman ni Simon bayat nga adda da idiay Ilocos Sur gapo iti saan pay a masinunuo a rason.
Nupay kasta, inbatad ni Pol. Col. Cesar Pasiwen, provincial driector ditoy probinsya nga imbestigaren da no anya ti pudno a napasamak gapo ta rumrumwar a sensitibo dagiti dadduma nga impormasyon.
Naamoan a gapo iti pasamak ket adda ti kamuol ken black eye ni Simon idi napan rinescue dagiti otoridad manipud ditoy probinsya, iti up-upaan na a balay idiay Ilocos Sur.
Daytoy ket babaen ti pannakikoordenar ni Pasiwen iti hepe ti PNP-Vigan, ISPPO ken ti Regional Office ti PNP.
Inbatad pay ni Pasiwen nga adalen da no mangipila da ti reklamo kontra kenni de Guzman iti laksid nga idiay Ilocos Sur a napasamak ti maipagarop a panagdangran.
Iti agdama ket adda iti kustudiyar ti PNP ni Simon.
