LAOAG CITY – Inaprobaranen ti konseho ti ordinasa para iti pannakailibre ti panagbuya ti sine dagiti senior citizens ken addaan ti rangkap ti bagina ditoy ciudad ti Laoag.
Daytoy ket naipasa babaen iti walo a botos, maysa nga abstention ken zero negative votes.
Inlawlawag ni Sanguniang Panglunsod Member Jayson Perera a nag-abstain gapu ta kalikagom na nga adalen pay laeng a naimbag ti nasao nga ordinansa.
Mainaig iti daytoy, kiniddaw na ti pannakaikat na kas maysa kadagiti sponsor iti nasao nga ordinansa.
Iti baet daytoy, naan-anay a naipasa ken naaprobaran ti nasao nga ordinansa.
Maipalagip a daytoy nga addang ti konseho ket tapno maikkan iti gundaway dagiti senior citizens ken addaan iti rangkap ti bagi a makabuya kadagiti nagduduma a pelikula tapno maalay-ayan wenno maikkat ti marikrikna da nga stress.
