LAOAG CITY – Inlawlawag ni Atty. Joel Gines, ti Provincial Election Officer ditoy probinsya ti nagbalin a rakurak ni Commission on Elections Chairman George Erwin Garcia mainaig kadagiti contractor nga agdondonar kadagiti politiko.
Kunana a nakaiyataday iti omnibus election code a maysa daytoy nga election offence ken mabalin a mabalud iti maysa agingga iti inem a tawen ti maysa a public official no mapaneknekan a karaman iti kastoy nga aramid.
Segun kenkuana, no adda ti final judgment ti korte mainaig iti daytoy ket mabalin a madiskwalipka ti kandidato wenno ti opisyal ti gobierno ken saanen a mabalin pay a tumaray iti aniaman a posisyon.
Kabayatanna, inbatad na a mabalin met a mairaman laeng iti statement of contribution and expenditure ti donasyon no nagdonar ti contractor kas maysa nga indibidual nga awan pay ti naawat na a kontrata ti gobierno, ken masapol nga awan ti maawat na a kontrata kalpasan ti eleksyon.
Nupay kasta, kun na a no nagdonar ken makita iti rekord nga adda ti kontrata na manipod iti gobierno ket maibilang daytoy a conflict of interest.
