LAOAG CITY – Agngudo iti panagipasa ken panagbayad ti income tax return para iti tawen 2023 inton Abril 15 ita a tawen 2024.
Daytoy ti inpakaammo ni Mr. Aldrin Camba, ti Revenue District Officer ti Bureau of Internal Revenue ditoy siudad ti Laoag.
Kunana a mabalin nga iproseso daytoy babaen iti online tapno saanen a kasapulan pay a dumanon mismo iti opisinada.
Babaen iti daytoy, inbatadna a saan a mataktak dagiti umili nangruna kadagiti agnanaed wenno aggapu pay laeng kadagiti nasusulinek a lugar tapno asikasoen daytoy a banag.
Inlawlawagna a ti buis a makolektarda ket dakkel a makatulong iti pagilian tapno adda ti pagkautan a pundo ti gobierno a mausar para kadagiti maipatungpal a proyekto a pakabenipisiaran dagiti naruay a Pilipino.
