LAOAG CITY – Inbilin ni Pres. Ferdinand Marcos Jr. kadagiti amin a pangopisinaan ti gobierno ken kadagiti mangidadaulo dagiti pagadalan nga isapsapa ti panangideklara ti pannakasuspenso kadagiti trabaho ken klase iti baet ti iduduprak ti Bagyo Enteng.
Inbatadna a nasken nga iti rabii pay laeng ket sakbay a maturog dagiti umili ket mairuaren ti bulletin.
Idinto a dagiti adda iti Local Government Units (LGUs) ti agdesision no isuspensoda ti trabaho ken serrek kadagiti pagadalan iti maseknanda a lugar.
Kagiddan daytoy, kuna ni Pres. Marcos a nasaysayaat a saan pay laeng nga agpaayab ti taripnong iti National Disaster Risk Reduction and Management Council (NDRRMC) command center idiay Quezon City ken ipabus-oyda pay laeng nga agtrabaho dagitoy.
Inlawlawagna nga agtultuloy ti standard operating procedures ken panagmonitor ti gobierno iti sasaaden ti bagyo.
Kunana a napateg a kitaen ti kasasaad dagiti agtartrabaho no makapanda kadagiti pangopisinaanda ken no natalgedda a makaawid kadagiti pagtaenganda.
Inpasigurado ti Presidente a nakasagana ti gobierno iti aniaman a resulta iti iduduprak ti bagyo ken solbaren ti kasapulan dagiti naapektaran a residente.
Gapu iti Bagyo Enteng, sinuspenso ti Malakanyang ti serrek iti trabaho ken klase kadagiti pampubliko ken pribado a pagadalan iti National Capital Region (NCR) ken Region 4-A idi kalman ken ita nga aldaw.
Kabayatanna, inikkan ti gobierno ti bileg kadagiti mangidadaulo kadagiti pribado a pangopisinaan ti pannaaksuspenso ti serrek.
