LAOAG CITY – Kinumpirmaran ni dati nga United States Pres. Donald Trump a saanen a naisubli pay ti bassit a paset ti lapayagna a natamaan ti bala idi isuna ket pinaltugan ti agtawen iti 20 a suspek idiay Pennsylvania.
Inbatad ni Trump, dagus met isuna a nai-secure ti Secret Service kalpasan ti assassination attempt.
Nupay kasta, gapu iti gagem dagiti security personnel a maprotektaran isuna, nagbalin nga alisto ti garaw dagitoy ken naikkat pay ti sapatos.
Kunana a kalikagumna pay nga agsarita ngem kinasapulanna a tumalawen iti nasao a lugar.
Nagsagaba ni Trump ti gasgas iti abagana a naalana kalpasan a nagkubbo ken apagapaman a nagpakleb.
Inbagana nga agatendar daytoy iti pannakaitabon ni Corey Comperatore a maysa kadagiti nagatendar iti panagbitlana a nairaman iti pammaltog.
Kabayatanna, naminsan manen a nagyaman ti dati a Presidente iti agtultuloy a panangsuporta kadakuada iti baet ti napasamak iti Pennsylvania.
