LAOAG CITY – Agtultuloy ti Pilipinas kas leading rice importer wenno umun-una iti amin iti intero a lubong maipapan iti panagangkat ti bagas.
Maibasar daytoy iti panagadal ti United States Department of Agriculture no sadino ita a tawen ket manamnama pay a dumanon iti agingga 4.1 million metric tons a bagas ti angkaten ti pagilian.
Nangatngato daytoy ti 5.1% maidasig iti 3.9 million metric tons a bagas nga inangkat ti Pilipinas iti napalabas a tawen 2023 iti baet ti manamnama a panagdur-as ti populasion ken turismo iti pagilian.
Kabayatanna, iti kapada a panagadal ket rumrummuar met a ti laeng India ti kangrunaan a pagilian kas rice exporter iti intero a lubong no sadino manamnama a makapag-export daytoy ti agingga 18 million metric tons a bagas a katukad met ti 1.3 ti pakabuklan a global export volume.
Iti baet daytoy dagiti trade restrictive measures a sangsangoen ti nasao a pagilian iti maysa a paset ti rice exports-da ngem dinakamat dagiti eksperto a manamnama nga agbalin a natibker ti rice exports daytoy.
