LAOAG CITY – Linawlawagan ni Police Major Ryan Retotar, ti chief of police ti PNP-Dingras ti dimmanon a reklamo a ti rason ti pannakatay ni Andrew Jumaoan iti Barangay Peralta ket gapo ta nadangran.
Ummuna iti daytoy, kuna ni Retotar nga adda ti naawat da a report manipud iti ina ni Pasion a nabartek ti anak na ken agwalwala rason a dagus a nagturong dagiti pulis iti lugar.
Nupay kasta, kuna ni Retotar nga idi nakadanon dagiti pulis iti balay da Pasion ket matmaturog daytoyen ken saan a pulos a naikabil iti istasyon ti pulisya.
Segun kenni Retotar, kuna ti ina ni Pasion nga intaray da daytoy iti ospital iti nasao nga ili ken naresetaan ti para-ulcer ken naduktalan nga agin-inom, ken inyakar da iti Provincial Hospital ngem idi iyakar da kuma manen iti ospital idiay Batac ket natayen.
Mainaig iti daytoy, kuna ti hepe a masapol a mimbestigaran a nalaing ti pasamak gapo iti alegasyon a maipagarop a nakugtaran a rason ti ipupusay ti lalaki.
Inpetteng na nga iti biang ti PNP ket kalikagom da met a maamoan no anya ti pudno a rason ti nakatayan ti Pasion ken ammoen da amin ti resulta ti eksaminasyon ti ospital, ken kalikagom da nga ipa-autopsy.
