LAOAG CITY – Naka-full alert status ti Philippine National Police kas panagsagsagana iti manamnama nga anti-corruption protest rally a naikeddeng inton bigat, Septiembre 21.
Daytoy ket maysa nga addang tapno masigurado ti seguridad ken kinatalged ti amin iti baet ti panag-rally.
Basar iti Philippine National Police (PNP), sumurok 50 a ribu a pulis ti nai-deploy kadagiti nagduduma a paset ti pagilian.
Ti dakkel daytoy a bilang dagiti pulis ket mangipasigurado nga umdas ti puersa tapno mapagtalinaed ti kinaurnos ken seguridad iti intero a pagilian.
Kagiddan daytoy, maaddaan ti naiget a koordinasion iti Armed Forces of the Philippines (AFP) ken dadduma pay nga ahensia ti gobierno.
Ti sibubukel a puersa ti National Capital Region Police Office ket naka-deploy-en kadagiti kangrunaan a lugar iti National Capital Region.
Malaksid iti daytoy, dagiti Police Regional Offices kadagiti nagduduma a rehion ken ti Reactionary Standby Support Force ket nakabantay ken nakasagana a tumulong nga insigida no kasapulan ti presensiada.
Inpetteng ni Acting Chief PNP Police Lieutenant General Jose Melencio Nartatez Jr. a ti kangrunaan a gagem daytoy nga addang ket siguradoen ti kinatalged ti publiko iti pakabuklan ti aktibidad.
Innayonna a gagem pay daytoy a marespetar ti karebbengan ti tunggal umili nga agtitipon a naannayas ken nakappia.
