LAOAG CITY – Inaprubaranen ni Presidente Ferdinand Marcos Jr., ti 2026 National Expenditure Program (NEP) a P6.793 trillion para iti sumaruno a tawen.
Ti nasao a pondo ket nangatngato no ikompara iti 2025 national budget nga umabot iti ₱6.326 trillion.
Inaramid ti presidente ti panangaprubar ti nailungalong a pondo para iti 2026 kabayatan ti Cabinet Meeting.
Segun ken ni Palace Press Officer USec Claire Castro, ti 2026 proposed budget ket gagem na a maipangato ti kalidad ti edukasyon, palag-anen ti panagbiag dagiti umili.
Iti Cabinet Meeting a naisayangkat iti Palasyo ti Malakanyang, inpetteng ti presidente a ti national budget para iti sumaruno a tawen ket saan laeng a para iti panagdur-as ti ekonomiya no di ket lumung-aw ti biag dagiti Pilipino.
Inpasigurado pay ti presidente a marikna daytoy ti kada Pilipino.
Target nga isumitir ti Department of Budget and Management ti 2026 budget iti Kongreso intono Agosto ita a tawen.
