LAOAG CITY – Nagtultuloy a ngimmato ti presio ti karne ti manok idiay Metro Manila kagiddan ti panagngato pay ti demand.
Basar iti Department of Agriculture (DA), epekto daytoy ti African Swine Fever (ASF) virus no sadino nga agamak dagiti konsyumer a gumatang ti karne ti baboy gapu iti agwarwaras nga African Swine Fever virus.
Basar iti kaudian a price watch nga inruar ti Department of Agriculture para iti Metro Manila, agay-ayam manipud iti P180 agingga iti P240 ti kada kilo ti manok nga ilaklako kadagiti kangrunaan a tiendaan idiay Metro Manila.
Adayo nga amang a nangatngato daytoy maidasig iti P175 agingga iti P210 iti kada kilo a nairekord iti napalabas a lawas ti Hunio wenno sakbay ti panagraira ti African Swine Fever virus.
Daytoy ket iti baet ti immunan a panangilawlawag ti Department of Agriculture a natalged a kanen ti karne ti baboy kadagiti merkado publiko iti baet ti agtultuloy a panagadu ti kaso ti African Swine Fever virus.
Kabayatanna, naammoan a ti presio ti karne ti baboy ket agay-ayam met iti nagbaetan ti P280 agingga iti P400 iti kada kilo.
