LAOAG CITY – Mangiyuswat ti donation drive ti Pugad Lawin – Ilocos Norte Chapter para kadagiti nagbalin a biktima kadagiti naglabas a bagyo a dimmuprak iti probinsia ti Cagayan.
Segun ken ni Engr. Neil Jose, mangrugi ita nga aldaw ti panangukkonda kadagiti donasion a maipatulod idiay Cagayan inton Mierkoles, Nobiembre 20.
Inbatadna a dagiti kangrunaan a masapol a maipatulod a tulong idiay Cagayan ket dagiti taraon, danom, hardware materials ken dadduma pay.
Kunana a nagkiddawda pay kadagiti maseknan a barangay officials kadagiti nagduduma a barangay iti intero a probinsia ti Ilocos Norte a gutigutenda dagiti kabarangayanda nga agidonar dagiti kangrunaan a kasapulan ita para kadagiti residente idiay Cagayan.
Inlawlawagna a no adda ti naukkonda a donasion ket mabalinda a tawagan isuda tapno mapanda mismo alaen dagitoy iti barangayda.
Innayonna a dagiti kangrunaan a pakaipatulod kadagiti maukkonda a tulong ket iti ili ti Santa Ana, Gonzaga, Buguey ken Baggao a dagitoy ti ad-adda a nakapasar ti nakaro nga epekto kadagiti naglabas a bagyo.
Naammoan a ti nasao a donation drive ket napauloan iti Bangon Cagayanos, Bangon Cagayan.
Kabayatanna, saan met daytoy ti umuna a gundaway a nangiyuswatda ti donation drive idiay Cagayan gapu ta addan dagiti immun-una a donation drive-da kadagiti naglabas a tawen.
