LAOAG CITY – Nagballigi ti nagtitipon a pwersa ti Philippine National Police (PNP)-Laoag, PDEU-Ilocos Norte, PIU INPPO, PDEA Ilocos Norte, RPDEU ken RID PRO1, 1st PMFC Ilocos Norte, 101st RFMB 1, 1st DECU Ilocos Norte a nangtiliw ti maysa a lalaki iti naiyuswat a drug buy-bust operation iti Brgy. Sta. Angela, Fariñas St. ditoy ciudad ti Laoag.
Nabigbig ti subject iti operasyon a ni Richard Villa alyas Balong, agtawen ti 30, baro ken residente iti Brgy. 29, Lusong ditoy ciudad.
Dagus a kinemmeg dagiti otoridad ti suspek kalpasan a naglako ti maysa a sachet a naglaon ti maipagarop a shabu nga agbalor ti sangaribo a pisos.
Iti panangkapkap dagiti otoridad iti suspek ket nakaala da pay iti ikot na ti dua a sachet a naglaon ti maipagarop a shabu, tissue a naglaon ti maipagarop ti marijuana ken maysa a plastic sachet a naglaon ti maatap a marijuana.
Malaksid iti daytoy, nakumpiskar pay iti suspek ti maysa a backpack nga agmaris ti nangisit a naglaon ti dua a laptop, dua a cellphone, nagduduma a ramit para kadagiti gadgets, maysa a caliber 22 revolver nga addaan ti lima a bala ken maysa nga M26 fragmentation grenade.
Naamoan a ti suspek ket maibilang a miembro ti Akyat-bahay gang, notorious drug pusher, miembro ti drug group, adda iti drug watchlist iti provincial level ken karuruwar na laeng iti pagbaludan partikular iti Bureau of Jail Management and Penology (BJMP) ditoy ciudad.
Kabayatanna, naglikudan amin ti suspek dagiti naala nga ebidensya kontra kenkuana.
Inpetteng na a ti backpack ket inpaiggem laeng kenkuana ti barkada na ken inayaban da laeng isuna gapu ta adda ti mapan da tiliwen, ngem saanna nga inpagarop a daytoy ti tiliwen da.
Inbutaktak na nga adda ti grupo na iti muslim compound no sadinno a boss na ti maysa a muslim ken naggapo met laeng iti BJMP ti maysa a barkada na.
Inbaga na a namindua a naibalud no sadinno nga idi damo ket gapu iti panangdangran na iti kinadenna na idinto a ti maikadwa ket gapu iti kaso na a panagtakaw.
Mainaig iti daytoy, kalpasan ti operasyon ket dagus nga adda ti maysa a babai a napan nangbigbig ti maysa a laptop ken maysa a cellphone a nakumpiskar ken ni Villa a kukua na.
