LAOAG CITY – Kinumpirmaran ni PLt. Col. Rafael Lero, ti hepe ti PNP-Laoag a naipilan ti kaso kontra kadagiti siyam a lallaki ti natiliw gapu iti iligal a panagsusugal iti Brgy. 21 ditoy siudad ti Laoag.
Ummunan a binigbig ni Lero dagiti siyam nga agtawen ti 45, naasawan, buy and sell scrap, residente iti Brgy. 22 ditoy siudad; agtawen ti 57, naasawan vendor, residente ti Brgy. 3 San Nicolas; agtawen ti 36, naasawaan, tricycle driver, residente iti Brgy. 20 iti ili ti Piddig; agtawen ti 47, single, unemployed ken residente iti Brgy. 26 ditoy siudad; agtawen ti 47, single, vendor ken residente iti Brgy. 21 ditoy siudad; agtawen ti 37, single, unemployed, residente iti Brgy. 25 iti ili ti Vintar; agtawen ti 42, single, tricyle driver, residente iti Brgy. 10 iti ili ti Vintar; agtawen ti 49, naasawaan, ambulant vendor, residente iti Brgy. 21 ditoy siudad ken maysa nga agtawen ti 59, naasawaan, baker, residente iti Brgy. 20 ditoy siudad.
Segun kenni Lero, posible a mapilaan pay ti kaso ti agtagikua iti pagbilyaran ken mapagsaludsosan no adda ti ammo na iti iligal a panagsusugal.
Inlawlawag na a sakbay nga inyuswat da ti operasyon ket adda ti timmawag kadakuada a napigsa ti panagpipinnusta iti nasao a lugar.
Maipalagip a naaktuan nga agay-ayam ti billiards dagiti maseknan kabayatan ti panagresponde dagiti otoridad ken nakumpiskar ti 16 a pidaso ti billiard ball, maysa a pidaso ti billiard setter, dua a pidaso ti billiard stick, dua a casing ti billiard stick, P2,130 a pusta ken maysa a chalk pakairamanan ti P3,170 a naala manipod kadagiti nagpusta.
Kabayatanna, agtultuloy met a mabirbirok dagiti uppat a nakalibas nu sadino a maysa kadagitoy ti residente iti Brgy. Colombia iti ili ti Vintar ken tallo a residente ditoy siudad ken maipilan to met ti kaso kontra kadagitoy babaen iti regular filing.
