LAOAG CITY – Kinumpirmaran ni Mayor Remigio Medrano iti ili ti Sarrat nga addan iti red zone ti lugar da gapo iti panagpositibo iti African Swine Fever dagiti baboy iti maysa a piggery farm iti Barangay 14.
Segun kenni Medrano, addan ti nasurok 20 a baboy ti natay iti nasao a piggery farm ken maipagarop nga agbangsit gapo ta saan a magabenan ti agtagikua a mangikali kadagitoy.
Inlawlawag na a sakbay a naamoan ti Municipal Agriculture Office ket pimmusayen dagiti sumagmamano a baboy iti nadakamat a piggery.
Gapo iti daytoy ket dagus da a nakikoordenar kenni Dr. Loida Valenzuela, ti Provincial Veterinarian tapno maala ken maipatulod iti Region dagiti specimen dagiti baboy.
Kunana a kalpasan a naawat da ti kumpirmasyon manipud iti Provincial Veterinary Office ket dagus da met a nagtignay ken inyuswat ti culling operation no sadinno nga iti uneg ti 500-meter radius ket umabot iti 138 ti apektado.
Mainaig iti daytoy, kunana nga awan pay ti beripikado a rason no kasano a naiserrek ti ASF iti nasao a lugar ngem rumrumuar nga adda ti inyaban ti agtagikua iti piggery a technician a napan nangkita kadagiti baboy idi madlaw na a sabali ti sitwasyon dagitoy.
Kabayatanna, inbatad na nga adda metten ti inisyal a tulong da kadagiti agtartaraken ti baboy a naapektaran ken manamnama nga adda pay ti sumaruno.
