LAOAG CITY – Masaksakit dagiti sumagmamano a Filipino seafarers nga hostage ti grupo nga Houthi iti Red Sea gapu iti malaria.
Daytoy ti kinumpirmaran ni Presidential Communications Office (PCO) Secretary Cheloy Garafil ken kunana nga agtultuloy ti pannakikammayet ti Pilipinas iti gobierno ti Yemen tapno ikkan ti medical assistance dagiti Pinoy crew members ti MV Galaxy leader.
Inbatadna a manarimaan ti panangtratar ti gobierno ti pannakawayawaya dagiti Pilipino para iti humanitarian reasons.
Segun ken ni Honorary Consul to Yemen Mohammad Saleh Al-Jamal a nagkiddaw daytoyen ti tulong iti Sana’a authorities para iti pannakawayawaya dagiti Pinoy para iti humanitarian reasons gapu iti kumarkaro a kondision iti salun-at dagitoy.
Kas sungbat ti gobierno ti Sana’a, dinakamatna a tumulong isuda iti babaen ti panangipatulod kadagiti doktor iti barko tapno mangipaay iti aniaman a medical procedures a kasapulan dagiti crew.
Naammoan a ti Sana’a ti addaan ti bileg iti Houthis no sadinno ti capital ket kadakkelan a siudad idiay Yemen.
Nupay kasta, inlawlawag met ti Sana’a government a ti saritaan maipanggep iti pannakawayawaya dagiti Pinoy crew ket nakadepende latta iti external decisions ken nakadepende iti negosasion ken diskusion iti nagbaetan ti specialists ken iti Presidency ti Yemeni Republic iti babaen ti Houthi government
Iti agdama, iyur-uray ti Office of the Undersecretary for Migration Affairs ti Department of Foreign Affairs ti report ni Al-Jamal kalpasan ti follow-up meeting iti nagbaetan ti Ambassador Ahmed Omar ken representatives ti Yemeni Foreign Ministry iti Sana’a.
Kabayatanna, naipadanon metten ken ni Presidente Ferdinand Marcos Jr. ti kasasaad dagiti Pinoy seafarers.
Immuna iti daytoy, inbatad ti Presidente a natalged dagiti Filipino seafarers iti panangraut ti Israel iti port ti Hodeidah, Yemen.
