LAOAG CITY – Inyalud-od ti Bureau of Internal Revenue ti deadlines para iti pannakaisubmitir, panangipila ken panagbayad ti buis kalpasan ti pannakapasar ti napalabas a Super Typhoon Carina ken Habagat.
Basar iti ahensia, ti deadline iti panagbayad ti buis ket inyalud-od pay agingga iti aldaw ti Mierkoles, Hulyo 31 kadagiti lugar a nakaro a naapektaran ti bagyo kas ti Revenue District Offices iti Region 3, Region 4A ken National Capital Region.
Karaman ditoy ti panangisubmitir ti Quarterly List of Sales/Purchases/Importations ti maysa a VAT Registered Taxpayer-Non-Electronic Filing ken Payment System (eFPS) Filers para iti Quarter a nagngudo idi Hunio 30, 2024.
Pakairamanan pay ti submission ti nasapataan nga statement ti Manufacturer’s wenno Importer’s Volume of Sales ti kada partikular a Brand ti Alcohol Products, Tobacco Products ken Sweetened Beverage Products para iti Quarter nga agngudo idi Hunio 30, 2024.
Malaksid iti daytoy, karaman pay ti e-filing wenno filing ken e-payment/payment ti Quarterly Value-Added Tax Return para iti Quarter nga agngudo iti Hunio 30, 2024 ken ti e-filing/filing ken e-payment/payment ti Quarterly Percentage Tax Return para iti Quarter nga agngudo iti Hunio 30, 2024.
Basar iti Bureau of Internal Revenue, naiyalud-od pay ti deadline kas panangbigbig iti napasaran a didigra dagiti taxpayer kas resulta ti kinaawan ti transportasion ken dadduma pay a kangrunaan a serbisio gubuay iti bagyo.
