LAOAG CITY – Inpasingked dagiti sumagmamano nga aglaklako ti shellfish iti Laoag City Public Market and Commercial Complex nga awan ti epektona dagiti ilaklakoda iti paralytic shellfish poison wenno toxic red tide.
Nupay kasta, inadmitir ni Mr. Kuatro Salvador, maysa kadagiti fish vendor iti nasao a merkado publiko, saan a mailibak nga adda ti panagkapsot ti panaglakoda kadagiti shellfish tunggal adda ti maipadamag nga adda ti napasamak a toxic red tide iti sabali a lugar ditoy pagilian.
Inbatadna a no adda dagiti lugar a makapasar ti toxic red tide ket mariknada nga adda dagiti saan nga aggatang kadakuada gapu iti amak dagitoy.
Gapu iti daytoy, kunana a marigatanda a makaallukoy kadagiti kustomer ngem inpasgingkedna nga amin nga ilaklakoda a shellfish ket dimmalan iti umiso a proseso ken natalged dagitoy.
Inlawlawagna nga adda ti birbirokenda nga auxiliary kadagiti supplier a paggatanganda kadagiti shellfish a mangipaneknek a natalged amin dagiti ilaklakoda.
Mainaig iti daytoy, inpakaammona nga umabot iti 100 a pisos agingga 120 a pisos iti kada kilo ti tahong nga ilaklakoda nga agdama.
Kabayatanna, kunana nga awan met pay ti panagbalbaliw ti presio dagiti ilaklakoda a shellfish iti baet nga adda ti red tide alert a maipakpakat.
Immuna iti daytoy, nagballaag ti Department of Health (DOH) iti publiko kontra iti makan a shellfish manipod kadagiti innem a lugar iti Visayas ken Mindanao gapu iti paralytic shellfish poison wenno toxic red tide.
