LAOAG CITY – Naarestar ti maysa a tricycle driver kalpasan a naalaan ti glass tube tooter iti Unique Bar iti Brgy. 7-A ditoy siudad ti Laoag.
Nabigbig ti suspek a ni Darius Miguel Eugenio, agtawen iti 48, naasawaan ken residente ti Hernando St., Brgy. 1, San Lorenzo ditoy siudad ti Laoag.
Basar iti Laoag City Police Station, kas paset ti standard operating procedure ti bar ken tapno maipasigurado nga amin a customers a sumrek iti bar ket awan ti intugotda a natatadem a banag wenno paraphernalia ket nangiwayatda ti inspeksion no sadinno a nakita ti maysa kadagiti empleado ti bar iti uneg ti sling bag ti suspek ti improvised glass tube tooter a maipagarup a burnt shabu residue.
Gapu iti daytoy, dagus a napan nagresponde dagiti kameng ti Laoag City Police Station pakairamanan ti 101st MC ken RMFB1 iti nasao a lugar.
Mainaig iti daytoy, nakumpiskar manipud iti suspek ti maysa nga sling bag nga agmaris ti gray, maysa nga electric razor; assorted batteries; nail cutter, mini notebook, reflectorized vest ken maysa a glass tuber tooter nga addaan ti maipagarup a burnt shabu residue.
Malaksid iti daytoy, naala pay manipud iti suspek ti maysa a coin purse nga agmaris ti nangisit a naglaon ti ID’s, dokumento, maysa nga unit ti selpon ken personal cash money a 90 a pisos.
Kabayatanna, naammoan a ti suspek ken dagiti ebidensia ket naikabil iti kuerpo ti pulisia para iti laboratory request ken medical examination.
