LAOAG CITY – Natay ti maysa nga ubing a lalaki nga agtawen iti uppat kalpasan a nalmes iti Bislak River iti Brgy. 5 iti ili ti Vintar
Segun ken ni Ms. Rochelle Navarro, ikit ti biktima nga imbes a ragsak ngem nagbalin a naladingit ti family bonding-da nga agkakabagian gapu iti napasamak nga insidente.
Inbatadna nga apaman a nakadanonda iti nasao a karayan ket dagus met a nagdidigusda pakairamanan dagiti ubbing.
Inlawlawagna a kalpasan ti agarup maysa nga oras ket inayabanda aminen ti miembro ti pamiliada tapno agrubuat nga agawiden.
Nupay kasta, inpalgakna a gapu ta agiinum pay laeng ti ama ti ubing a nalmes ket nagsublida iti karayan tapno agdidigus manen.
Kunana nga idi ayabanna manen dagiti kabagianna nga agawiden ket ditoy a nagsasaruno a timmakdang dagitoy ngem saanda a dagus a naripar ti maseknan nga ubing nga awanna pay.
Gapu iti daytoy, kinunana a naglabas pay laeng ti sumagmamano a minuto idi naobserbaranda nga awan pay ti ubing rason a dagusda a nagsubli iti puesto a paglanglanguyanna ket ditoyda a nakita ti awanen ti biagna nga ubing.
Mainaig iti daytoy, inkagumaanda nga iyuswatan ti Cardiopulmonary Resuscitation wenno CPR ti ubing ngem napaayda nga isalbar ti biagna.
Innayonna a pagat-siket ti kaadalem ti nakalmesan ti ubing no sadinno dimmanon iti agarup 30 a minuto sakbayda a nabirukan ti bangkay daytoy.
Kabayatanna, naammoan a buridek kadagiti tallo nga agkakabsat ti ubing a nalmes ken residente iti Brgy. 23 ditoy siudad ti Laoag.
