LAOAG CITY – Dinadael dagiti nakumpiskar nga iligal a paputok iti Ilocos Norte Police Provincial Office ita nga aldaw, Enero 3.
Daytoy ket babaen ti panangpalidlid ti pison ken panangiyuper iti danom ti drum kadagiti nakumpiskar nga iligal a paputok ditoy probinsia.
Segun ken ni Dr. Rickson Balalio, mangidadaulo ti Provincial Health Office, maibasar iti kaudian a datosda ket adda ti 27 a kaso ti fireworks-related injuries ditoy probinsia.
Mainaig iti daytoy, inbatad ni P/Col. Frederick Obar, Provincial Director ti Ilocos Norte Police Provincial Office a dumanon iti pakabuklan a 332 a boga ti nakumpiskar dagiti otoridad manipud kadagiti nagduduma nga ili ken siudad ditoy probinsia.
Inlawlawagna a kaadduan ti nakakumpiskaran ti boga ket manipud iti ili ti San Nicolas, Sarrat ken ditoy siudad ti Laoag.
Malaksid kadagiti boga ket adda pay dagiti paputok a nakumpiskar dagiti otoridad iti ili ti Dingras kalpasan nga awan ti naipakita kadakuda a business permit dagitoy.
Kabayatanna, indauloan da Atty. Gerald Gallardo, mangidadaulo ti Department of the Interior and Local Government, P/Col. Frederick Obar, Provincial Director ti Ilocos Norte Police Provincial Office, Fire Superintendent Roxanne Parado, Provincial Fire Marshal ti Bureau of Fire Protection ditoy probinsia, Mr. Marcell Tabije, mangidadaulo ti Provincial Disaster Risk Reduction and Management Office ken Dr. Rickson Balalio, mangidadaulo ti Provincial Health Office ti pannakadadael dagiti nakumpiskar nga iligal a paputok.
