LAOAG CITY – Inlawlawag ni Police Major Ryan Retotar, ti chief of police ti PNP-Dingras nga awan ti makitkita da a foul play iti panagpakamatay ti maysa a lalaki iti Barangay Suyo iti nasao nga ili.
Nabigbig daytoy a ni Eleazar Balcarze y Agduyeng, agtawen ti 38, naasawaaan, delibery boy ken residente iti nadakamat a barangay.
Segun kenni Retotar, iti inisyal nga imbestigasyon da ket mabalin a na-pressure ni Balcarze gapo ta maipagarop a saan na a mairemit ti kwarta a naglakoan na ti danom.
Inbatad na a naduktalan ti boss ni Balcarze a dagiti danom a naideliver na ket nabayadanen ngem awan ti inremit na a kwarta.
Innayon ni Retotar a naamoan da nga adda manen ti kastoy a pasamak iti naglabas a nagtrabahoan ni Balcarze.
Maipalagip a nakita laengen ti ina ni Balcarze a nakabitin ti lalaki iti uneg ti balay da ken apaman a naitaray iti ospital ken naideklara a dead on arrival.
