LAOAG CITY – Addan ti suspek a manamnama a mapilaan ti reklamo a frustrated murder ken attempted murder iti pannakapalto-paltog ni Gema Gapusa a taga Barangay Nagbacalan iti ili ti Paoay iti paset ti Barangay Veronica iti met laeng nasao nga ili.
Daytoy ti inbatad ni Police Major Eddie Suyat, ti chief of police iti ili ti Paoay.
Maipalagip a napasamak ti pammaltog kabayatan ti panagdaldalyasat ti biktima kadwa na ti asawa na a ni Reynante Gapus a nakalugan ti motorsiklo iti nasao a barangay.
Nagsagaba ni Gema ti sugat iti baba ti kili-kili ken pispis na idinto a saan a naan-ano ti asawa na.
Inbaga ni Suyat a ti laengen ur-urayen da ket ti medical certificate ti biktima gapu ta adda pay laeng daytoy iti ospital.
Kuna pay ni Suyat a mismo nga intudo ti biktima dagiti suspek a residente met laeng iti ili ti Paoay ken saan a gun for hire dagitoy.
