LAOAG CITY – Inbatad ni Police Capt. Dionisio Baldillo, ti chief of police iti ili ti Bacarra a maibilang a bigtime drug pusher ni Mr. Andy Lim, ti subject ti search warrant operation iti Barangay 39, Pasiocan iti nasao nga ili.
Daytoy ket gapu ta ni Lima ket No. 8 drug personality iti regional level ken maikalima iti Drug watchlist ti PDEA.
Nakumpiskar dagiti otoridad iti uneg ti pagtaengan ni Lima ti 20 a sachet a maipagarop a naglaon ti shabu, uppat a dadakkel a sachet a naglaon met ti maipagarop a marijuana no sadinno a dagitoy ket naipan iti pakete ti sigarilyo.
Malaksid kadagitoy ket adda pay ti naala dagiti otoridad a lima nga empty sachet a maipagarop a nagyanan ti maipawil a droga ken foil.
Maipalagip nga idi Enero ita a tawen ket naisayangkatan ti drug buy-bust operation ni Lim ngem nakataray daytoy ken naibasura ti reklamo a naipila kontra kenkuana gapu ta saan a kompleto dagiti nagtestigo iti naiwayat nga operasyon.
Nupay kasta, kuna ni Baldillo nga intultuloy latta ni Lim ti illegal nga aktibidad na isut gapuna nga insayangkatan da daytoy ti search operation.
Sinungbatan met ni Baldillo ti alegasyon ti pamilya ni Lim a naimula dagiti naala nga ebidensya kontra iti subject ti operasyon no sadinno nga inbaga ti opisyal a karbengan dagiti maseknan ti agsarita ken agisawang ti kayat da nga ibaga ngem iti korte ti pakasungbatan amin dagitoy.
