LAOAG CITY – Nagtalinaed iti Philippine National Police ti maysa a mannalon a suspek a nangpaltog iti nakariri na a seaman iti maysa a minatayan iti Barangay Rayuray iti ciudad ti Batac.
Daytoy ti inbatad ni Police Lt. Col. Jerome Wangkey, ti chief of police iti ciudad ti Batac.
Kuna ni Wangkey a naipilan ti kaso a frustrated murder babaen ti inquest proceeding kontra iti suspek nga agtawen ti 43, mannalon ken residente met laeng iti nadakamat a barangay.
Inbatad ni Wangkey nga adda ti nairekomendar a pagpiyansa ti suspek ngem no saan a makabayad ket maipisok iti Bureau of Jail Management and Penology iti ciudad ti Batac.
Maipalagip nga immunan nga inbatad ni Wangkey a basar iti imbestigasyon da kabayatan nga agay-ayam dagiti maseknan ti baraha iti minatayan ket adda ti saan a nagkinnaawatan ti suspek ken biktima ngem dagus metlaeng a napagsardeng dagitoy.
Kuna na a pumanaw koman ti biktima ken ti kadwa na iti lugar ngem nagsubli da tapno agpadespensar iti napasamak.
Nupay kasta, kabayatan ti ipapanaw ti biktima ket nakangngeg da ti putok ti paltog kalpasan na ket nakita da ti biktima nga adda ti sugatna idinto a nakita da ti suspek a nakaiggem ti saan a masinunuo ti klase na a paltog.
Naitaray a dagus ti biktima iti ospital para iti pannakaagas ti sugat iti buksitna ken addan iti natalged a kasasaad.
Naamoan a dagus met a nagtalapwagaw ti suspek ngem naarestar metlaeng dagiti otoridad iti Sitio Kawayan iti metlaeng Barangay Rayuray iti ciudad ti Batac babaen ti naisayangkat nga hot-pursuit operation.
Nakakumpiskar met dagiti otoridad iti nakapasamakan ti insidente ti maysa a basyo ti kalibre 45 a paltog.
