LAOAG CITY – Inbatad ti Department of Agriculture nga umaboten iti P3.40 billion ti balor dagiti nadadael iti agrikultura iti iduduprak ti Severe Tropical Storm Kristine.
Iti datos ti Department of Agriculture Regional Field Offices, dagiti naapektaran nga agricultural goods ket pagay, high-value crops, kasta met ti agricultural infrastructure nga addaan ti katukad a 174,087 a metriko tonelada ti production loss.
Basar iti Department of Agriculture, ti kaadoan a naapektaran ket dagiti mula a pagay nga adda iti 94.5% idinto a ti high-value crops ket 4.23%, dagiti mula a mais 1.14% ken iti fisheries ket 0.13%.
Kaadoan kadagiti nairekord a nadadael a pagay ket manipod iti Bicol region nga addaan ti P3.10 billion production loss ke agarop 4 iti 10 nga ektarya ti apektado a pagay ti naminpinsan a nadadael.
Kabayatanna, iti damage assessment iti livestock ken poultry, adda ti 3,009 ti napukaw iti iduduprak ti bagyo nga agbalor ti P4.35 million a kaadoan ket iti Ilocos region ken Socsksargen.
Adda ti pakabuklan a 79,904 a mannalon iti 11 a rehiyon ti naapektaran iti iduduprak ti bagyo.
Mainaig iti daytoy, nangipaayen ti tulong ti Department of Agriculture kadagiti mannalon iti P541.02 million a balor ti agricultural inputs kas ti rice, corn, vegetable seeds ken medicine para iti livestock ken poultry.
Innayon ti ahensya a matulungan pay dagiti apektado a mannalon babaen iti Quick Response Fund, Survival and Recovery (SURE) Loan Program, ken ti Philippine Crop Insurance Corporation.
