LAOAG CITY – Inpetteng ni Ukrainian President Volodymyr Zelensky a personal laeng daytoy nga agatendar iti panangpaayab iti panagsaritada ti Russia idiay Turkey no agatendar met ni Russian President Vladimir Putin.
Inlawlawagna a saan a makisarita isuna iti asinoman a tauhan wenno opisyial a mangibagi ken ni Putin iti nasao a banag.
Nakasagana ni Zelensky nga agbiahe idiay Turkey kalpasan a ginutigot isuna ni United States President Donald Trump a sangoen ni Putin.
Kinumpirmaran ti White House nga agturong idiay Turkey ni United States Secretary of State Marco Rubio tapno agatendar iti naikeddeng a cease-fire deal.
Maipalagip nga agtultuloy ti ar-aramiden a panangilungalong ti Estados Unidos ti maipapan iti kinakappia iti nagbaetan ti Russia ken Ukraine kalpasan ti sumurok tallo a tawen a rinnupak.
