LAOAG CITY – Nabenepisiaran ti 46 a Marginalized Solo Parents ditoy Ilocos Norte iti pananangipaay ti Provincial Government of Ilocos Norte ti tulong pinansial kadagitoy.
Indauloan a mismo ni Gob. Matthew Marcos Manotoc ti pannakaipaay ti nasao a tulong kadagiti maseknan.
Segun iti gobernador, 12 ribu a pisos ti inawat ti tunggal maysa a benepisiario iti nasao a programa.
Nupay kasta, ginutigotna dagiti maseknan a no kasapulanda ti nayun a tulong ket mabalin dagitoy ti agkiddaw iti gobierno probinsial kangrunaanna iti “livelihood” wenno nayon a pamastrekan kas iti taraknen a dingwen ken dadduma pay.
Kabayatanna, inlawlawag ni Mrs. Rochelle Gajes, Officer In-charge ti Provincial Social Welfare and Development Office a dagiti benepisiario ket napili babaen kadagiti City wenno Municipal Social Welfare and Development Office
Inpalgakna kas iti napalabas a tawen ket dua ti kada Local Government Units ti naipaayan ti tulong iti nasao a programa ti probinsia.
Iti baet daytoy, inbatadna a sabali dagiti nabenipisiaran itay napalabas a tawen ken sabali dagiti benepisiario ita a tawen.
