LAOAG CITY – Inikkaten ti Ilocos Norte Electric Cooperative wenno INEC dagiti agbibitin a waya dagiti telecommunications company kadagiti poste iti Barangay 51-A Nangalisan ditoy siudad ti Laoag.
Segun ken ni Barangay Chairman Allen Alcid iti nasao barangay, babaen iti daytoy ket awan ti motorista a posible a maikabil iti peggad ti biagda gapu ta naikkaten dagiti maibilang nga spaghetti wires.
Gapu iti daytoy, inbatadna a maragsakan unay gapu ta nasolbaren ti nabayagen a dakkel a problema dagiti sumagmamano a residente iti barangayda.
Inlawlawagna a kabinnulig mismo ti Ilocos Norte Electric Cooperative dagiti telecommunications company iti panangikkat kadagiti agbibitin a waya dagitoy.
Kabayatanna, naammoan a daytoy nga aktibidad ti nasao a kooperatiba ket maisayangkat agingga inton Marso 25 tapno maipasigurado nga awan ti asinoman a maperwisyo gapu kadagiti spaghetti wires dagiti telecommunications company.
